SEMANA DAS LETRAS GALEGAS

Vimos de celebrar recentemente a semana das Letras Galegas. Co gallo do día 17 de maio, acompañamos aos Departamentos de Lingua e Literatura Galega e Música na celebración dunha serie de actos e actividades para lembrar a importancia da nosa lingua en todos os ámbitos do noso centro.

O Departamento de Lingua e Literatura Galega artellou unha exposición para lembrar a figura de Florencio Delgado Gurriarán (1903-1987) avogado e escritor de Valdeorras que resultou homenaxeado no Día das Letras deste ano. Tamén se quixo lembrar xs autorxs homenaxeadxs noutros anos, lembrando aquelxs nadxs na provincia de Lugo (e algún infiltrado que outro…) e tamén invocando que o noso Fiz Vergara Vilariño poida acadar ese recoñecemento próximamente.

O Departamento de Galego tamén artellou unha actividade ben interesante, realizando co alumnado de 3º ESO PMAR unha serie de pequenas autopublicacións moi fermosas e mellor acabadas coas que realizaron unha pequena exposición na propia biblioteca.

E como broche de ouro final a esta Semana das Letras, o Departamento de Música organizou un concerto coa agrupación sarriá “Clarisaxos” integrada por moitas persoas da nosa comunidade educativa.

Día da Poesía (II): declarado o ESTADO POÉTICO PERMANENTE no noso centro!!

No recreo de onte decididimos secundar as actividades polo Día da Poesía coa declaración solemne do “Estado poético permanente” polo cal formamos un exército da palabra disposto a usar a palabra como bandeira universal e armándonos de libros limos un manifesto poético contra TODAS as guerras.

Tamén colocamos un mural para crear un manifesto máis aberto e participativo. Especial mención ao alumnado de 1 ESO e o 2 ESO C pola súa combativa participación!!

Librémonos de armas!! Armémonos de libros!!

Día da poesía (I): “Medre a poesía!” (homenaxe a Fiz Vergara Vilariño)

Máis de catrocentos rapazas e rapaces de todos os centros educativos da comarca concentráronse na Praza da Vila onte nun acto organizado pola nosa biblioteca irmá do IES “Gregorio Fernández”. O obxectivo era claro: reivindicar o Día das Letras Galegas para a figura e a obra de Fiz Vergara Vilariño, o noso poeta louzarín.

Do noso centro acudiron todos os grupos de Bacharelato, acompañados polas profesoras de Lingua e Literatura Galega: Lola Chaos, Teresa López e Carmen Vivero. Leron algunhas composicións poéticas de Fiz e o alumnado que forma a agrupación “Siniestro Parcial” culminou o acto coa súa actuación musical, na que se interpretaron temas que musicaban versos de Fiz Vergara Vilariño.

Un acto cheo de ledicia e entusiasmo que nos devolveu a enerxía e nos deu azos para seguir crecendo como comunidade lectora na defensa dos/as nosos/as autores/as locais.

No noso centro botamos man do material didáctico que nos achegou Eduardo Rey para extender a actividade tamén ao contexto das aulas e dese xeito arredondear unha xornada certamente memorable.

CELEBRAMOS A LUZ: Día da Candeloria

“Pola Candeloria casan os paxaros e vaise a galiñola” ou eso dí o noso refraneiro dos primeiros días de febreiro… vaites!!! Era hora xa de rematar con xaneiro,non?
O día da Candeloria celébrase o 2 de febreiro e ten unha orixe pagana vinculada a ritos que teñen que ver cono ciclos naturais. Malia isto, a Candeloria é, por riba, de todo unha festa da Luz que aventa a primaveira. Co Departamento de Bioloxía decidimos desenvolver un ciclo de actividades para recuperar o noso vínculo coa natureza ao longo de distintos momentos do curso. Neste caso, saimos fora para observar aos paxaros casadeiros e de paso aprender algo de ornitoloxía…!

Esta actividade está dentro da PXC en coordinación coa Vicedirección

“¡Contra viento y marea!”: 25N con Emilia Pardo Bazán

Este ano quixemos homenaxear á escritora Emilia Pardo Bazán no seu centenario e quixemos facelo da man de AnaBelén Durán (Lingua Castelá) e Begoña Arias (Plástica) inaugurando unha pequena exposición o día 25 de novembro para recoñecer a importancia que a autora e os seus escritos tiveron nesta loita contra a violencia de xénero.

Unha loita que ela comezou cando aínda case non existía o feminismo en España. Ela reivindicou a igualdade, reclamou leis que non abusaran da muller, defendeu o divorcio, denunciou a violencia en tódalas súas manifestacións (social, cultural, económica, familiar, doméstica, estética e psicolóxica), reivindicou a educación como solución e destapou a brutalidade á que as mulleres estaban sometidas. Falou de ” mullericidios” e retratou o medo e o abandono das vítimas que só acadaban algunha protección na soliedaridade das súas amigas e veciñas. Esas vítimas pertencían a todos os estamentos, reproducían moitas veces casos reais que a autora coñecía e tiñan nome propio. Ela berrou por elas na ficción, unha ficción simbólica na que se representan eses ” marcos do patriarcado” que, como di a crítica actual , ela comezou a mover.

A exposición foi realizada con obras orixinais do alumnado 4 ESO de Educación Plástica cunha técnica rompedora, o pop-art. Representacións que buscan a ruptura de todo tipo de moldes que Emilia Pardo Bazán levou a cabo na súa vida e na súa obra. Ela ” moveu os marcos”, co seu lema era ” contra viento y marea; oxalá nós poidamos derrubalos!!

Por que os legumes?

O alumnado de 4º da ESO de Bioloxía e Xeoloxía INVESTIGA as razón polas que os legumes foron elixidos coma protagonistas deste ano. Expoñen o seu traballo en formato cartel para contribuir aos obxectivos da ONU dándoo a coñecer a toda a comunidade educativa

Seguindo o lema “Sementes nutritivas para un futuro sustentable”, a Asemblea Xeral da ONU declarou o 2016 Ano Internacional dos Legumes, durante o cal se pretende concienciar acerca dos beneficios destes alimentos para lograr unha produción sustentable e lograr a seguridade alimentaria mundial e a nutrición da poboación.

MANUEL MARÍA EN ANAQUIÑOS DE CORES

Versos escollidos  polos alumnos de 1º ESO enchen os taboleiros do IES de rechamantes cores para lembranos  ao poeta chairego neste mes de maio. Primavera de papel, palabras  que agroman e fan rexurdir a voz de Manuel María polos corredores do Xograr, ledicia dunha primavera que anuncia días radiantes, que conmemora  non so un Día das Letras Galegas, senon un post-it para todo o 2016.

XVII EDICIÓN DO DÍA ESCOLAR DAS MATEMÁTICAS

No ano 2000, declarado pola UNESCO Ano Mundial das Matemáticas, acordouse  a celebración do día 12 de maio como Día Escolar das Matemáticas pola Federación Española de Sociedades de Profesores de Matemáticas (FESPM). A data elixida para esta celebración, 12 de maio, coincide coa do nacemento do insigne matemático Pedro Puig Adam, que foi o iniciador da didáctica das matemáticas no noso país, e que naceu o  12 de maio de 1900.

O tema proposto para este ano 2016 é: MATEMÁTICAS NO DEPORTE. 

Sumámonos a esta celebración cunha pequena exposición sobre a xeometría e medidas das pistas deportivas e curiosidades matemáticas do deporte que se poden atopar nos libros da nosa biblioteca .

III RECITAL POÉTICO VISUAL “CLÁSICOS DE SEMPRE”

O venres 29 de abril celebramos o Día do Libro cun espectáculo que levaba por título “Clásicos de sempre”.

Aquí vos deixamos o programa, un vídeo no que se recollen os momentos máis significativos e cinco  traballos  audiovisuais que co gallo deste día elaboraron algúns alumnos de 4ESO e 2ºBAC, dos que  debemos salientar a súa orixinalidade .

23 de Abril, día do libro

Este ano o Día do Libro ven cargado  de  homenaxes  e recoñecementos. Hai 400 anos  morrían dous dos máis grandes autores de todos os tempos: Cervantes e Shakespeare . A súa non foi  unha morte común porque  a súa pegada continúa estando hoxe presente. De aí  que   cando nos  refiramos a  eles  lles  concedamos  a categoría de “clásicos”. Ser un clásico   significa non pasar de moda , significa  non  acabar de dicir o que se tén que dicir , significa captar os  sentimentos universais e os  comportamentos   cotiáns, significa  conectar cos homes de todas as épocas   demostrando unha e outra vez que o que nos   distingue e define non son os tempos  nen as formas  senón   a materia sensible da que estamos feitos.  

As conmemoracións  inclúen ademáis  o 40  aniversario do Premio Cervantes que pasa por ser o galardón máis importante que se concede nas letras españolas e que  este ano  volve  viaxar a Hispanoamérica  ao serlle concedido ao escritor mexicano Fernando del Paso,  poeta e crítico ademáis de novelista .  Noticias del imperio, José Trigo o Palinuro de México  son algúns dos títulos  máis coñecidos.

Como  xa ven sendo unha tradición , a Biblioteca do centro e o Departamento de Língua Castelá  convocaron de novo  ao alumnado para   a   elaboración de  diferentes traballos que  estes días   serán expostos  no  corredor  da Biblioteca .  Este ano  e por  mor  do éxito que  veu de acadar o libro de Tania Balló  Las sinsombrero , aproveitamos para reivindicar  o papel da muller  na historia da literatura, unha reivindicación que xa empezara o insigne Cervantes hai  400 anos.

O pase de diapositivas require JavaScript.