Outra vez máis desfrutando do saber transmedia de @acoaira04 que veu a facer unha nova edición do seu obradoiro de manga para todas as seccións do noso Clube de Lectura. Entusiasmo, recomendacións e lecer a cachón. Gracias Aaron!
Beliscar, átomo, espantallo, castaña, agarimo… palabras que serviron para falar, sorprender e ilusionar e por suposto, para improvisar no Concurso de Oratoria que se celebrou hoxe no Xograr. Momentos de expectación, ilusión, ganas e sobrevoando o terreo, medo escénico, timidez, ansiedade, suor nas mans…, mais que gratificante ver que temos unha rapazada que gusta dos retos, que non ten medo de nada, que quere gañar e que… vai ir á final do concurso de ORATORIA IMPROVISADA que se celebrará no IES Río Cabe o día 13 de abril.
PARABÉNS a todxs pola vosa participación e por facernos vibrar e sentirnos orgullosas e orgullosos e, por suposto PARABÉNS aos gañadores:
1ª CATEGORÍA ( 1º-2º ESO )
Icía Veiga
Marc Lopez
Laura Somoza
2ª CATEGORÍA ( 3º-4º ESO )
Anxo Sobrado
Mateo Cumbraos
Sofía López
3ª CATEGORÍA ( 1º 2º BAC )
Diego Cao
Mauro Díaz
Carlos Vilariño
NO BICO, UN CANTAR REBELDE, matizariamos hoxe, con Rosalía, o poema de Curros. Rebelde por reivindicativo e solidario. Defensora dos máis débiles da súa contorna: as mulleres, os emigrantes, os orfos, a lingua e o pobo en xeral.
Carme Adán, filósofa, profesora e política; foi a persoa escollida para a redacción do Manifesto da AELG, que será lido no acto central do Día de Rosalía de Castro, o sábado 25 de febreiro no Panteón de Galegos Ilustres, en Santiago de Compostela. Neste manifesto Carme Adán fai unha lectura filosófica e reivindicativa, simbólica e moderna de Rosalía de Castro presentándoa como unha muller intelixente e sensible que estivo atenta para denunciar as inxustizas sociais e ideolóxicas do seu tempo: que converteu aquelas vítimas nas protagonistas dos seus versos e que berrou por todas elas.
Menudo festival do demo que se montou neste entroido no Xograr!! Había gañas de leria e notouse ben! Extraordinarias as comparsas: imaxinativas, divertidas, animadas a tope!! Desfrutamos de todos dos números, ata do dxs profesorxs!! Parabens a comparsa gañadora e viva o entroido!!!
Aquí tedes unhas imaxes coa nosa mesa de recomendacións lectoras e tamén con binoculares para practicar a ornitoloxía.
Outra actividade que tivemos o 30 de xaneiro consistiu nunha instalación para conmemorar o Día Internacional da Paz e da Non Violencia co título de “Aulas rotas, almas feridas”.
Neste curso, enfocámonos nunha realidade tráxica como é a destrución de escolas no conflito de Ucraína. Recreamos os espazos onde moitas/os nenas/os están a impartir aulas e proxectamos o documental “Aulas Rotas” para non esquencer que o dereito á educación está por riba de todos os conflitos e que os colexios son lugares para a paz que deben quedar afastados de toda agresión ou ataque.
Tamén editamos un pequeno pasquín cun manifesto que incluímos máis abaixo que foi repartido entre o alumnado para tentar difundir ó máximo posible esta realidade na nosa comunidade educativa. Agardamos poder contribuir cos nosos xestos a que as escolas deixen de ser obxectivos militares nos conflitos bélicos.
Xornada intensa o día 30 de xaneiro no noso centro que arrancou lembrando a María Antonia Dans, a artista homenaxeada no Día da Ilustración na súa décima edición. Nesta data conmemórase o nacemento de Castela a través dunha iniciativa institucional que pretende visibilizar o traballo de artistxs mediante a organización de actividades entre as que se inclúen exposicións bibliográficas, obradoiros ou exposicións organizadas nas bibliotecas galegas.
Co gallo desta data, realizamos unha pequena exposición no hall do edificio principal achegando información sobre esta singular artista coruñesa e traballos do alumnado de Begoña Arias, a nosa compañeira de EPeV, con interesantes interpretacións da obra de Dans en formato de portada. Podedes visitala ata o día 3 de febreiro.
A finais do mes pasado tivemos moita actividade arredor da presentación do libro “Radiante” de Manuel Darriba editado por #chandapolvora con dous actos en diferentes datas: un na Casa da Cultura de Sarria e outro no noso propio centro.
Marabillosa velada que nos brindou Teresa López, profesora de Lingua e Literatura Galega, xunto co noso alumnado no acto público de presentación do novo libro de Manuel Darriba “Radiante”, na Casa da Cultura de Sarria. “Radiante” é o novo libro deste autor sarriao, publicado nunha edición fantástica da editora compostelá Chan da Pólvora. Interviron Antón Lopo (editor), o propio autor e foron secundados por Ari, Thalia, Aitana, Xabi, Mateo, Fabia, Xana, Mauro, María, Lía, Slatel e Carlos cun variadísimo programa de interpretacións dos poemas do libro. Un acto extraordinario cheo de talento e sensibilidade que puido desfrutar toda a veciñanza de Sarria.
Tamén tivemos ocasión para realizar a presentación no noso centro, de novo da man da compañeira de galego, Teresa López. Manuel asinou un dos dous exemplares que temos no noso fondo e fíxonos unha visita para intercambiar experiencias e posturas arredor da creación, da escrita e da lectura. Un luxo de xornada!
O día 25 de novembro segue a ser unha data sinalada no calendario do noso centro. Dende a biblioteca seguimos denunciando a existencia da violencia de xénero. Seguimos lamentando, tamén, as mortes que provoca: 37 no ano 2022 (e 1.167 desde 2003); queremos amosar o noso rexeitamento a todas as accións violentas contra as mulleres, tamén a aquelas que transitan de forma máis sutil e menos explícita.
Este curso fixamos a nosa atención nas continuas mensaxes sexistas que seguen a estar arraigadas na nosa sociedade e que perpetúan os estereotipos machistas que queremos desterrar. Son moitas as situacións da vida cotiá, especialmente no entorno profesional, nas que a imaxe feminina é fundamental: azafatas, recepcionistas, secretarias, dependentas, camareiras… Se para os homes o currículo é máis importante que os seus bíceps, a beleza, nun mundo onde a demanda de emprego é inesgotable, funciona como un dispositivo discriminador cara ás mulleres.
Ao vivir insertos nunha cultura mediática que premia ás mulleres fermosas como representantes da modernidade, a felicidade e o éxito— en definitiva, os valores positivos da sociedade de consumo-, asistimos a unha desvalorización soterrada das mulleres menos agraciadas, vinculadas a valores non tan positivos. As democracias modernas non provocaron o declive desta imaxe senón que a intensificacron: a beleza converteuse nun valor de cambio nun mercado de masas. A hipersexualización e a sublimación de certa beleza présentase como un instrumento de éxito persoal ao que calquera muller pode optar sempre e cando o poida pagar. Pero o custo de axustarse aos modelos impostos é demasiado alto; a guerra á idade, ás imperfeccións, ás pequeneces, mina os recursos económicos e a autoestima das mulleres.
Estas ideas foron fundamentais para artellar unha serie de actividades no 25 de novembro coas que buscamos desenvonlver un espazo de reflexión de denuncia. Artellamos unha pequena instalación coa que quixemos revertir a nosa postura dende a linguaxe visual coa axuda do alumnado de Plástica de 4º de ESO. No recreo, realizamos tamén un acto público colectivo no que limos un manifesto e tamén repartimos brochuras poéticas arredor da crítica desa imaxe sexista da muller que vemos nos medios e na opinión pública. O alumnado de Introdución á Cultura Visual de 2º de Bacharelato completou a instalación cun traballo cooperativo arredora da realidade visual da muller nos medios de masa que serviu para pechar as actividades en torno a esta efeméride.
BiblioXograr 