Para esta data tan importante para a nosa biblioteca, tamén desenvolvimos unha actividade deseñada polas bibliotecas dos IES “Basanta Silva” (Vilalba) e “Xograr Afonso Gómez” Sarria co obxectivo de crear e desenvolver redes, vínculos e relacións entre as bibliotecas e as comunidades lectoras dentro dun programa de colaboración chamado “biblioembaixadas”.
Consiste nunha acción viral que se desenvolve no espazo dunha rede social (Instagram, Facebook ou Twitter) a través da pequena gravación dun vídeo que consiste na gravación dunha narración oral arredor dunha obra literaria que, polo motivo que sexa (lectura iniciática, determinante, fatal…), foi importante para a propia persoa participante.
Os vídeos teñen unha duración máxima de 1 minuto e a persoa participante tentará ofrecer a súa versión persoal da obra en cuestión dentro do seu poprio perfil coas etiquetas “#contochoeu!” + “#abibliotecaescolartenapalabra” + “#biblioembaixadas”. No bloque de texto da publicación explicarase de xeito claro a que obra se está a aludir. Ti xa fixeches o teu? Aínda non? Pois non esperes máis, cóntanolo!! TES ATA FINAL DE CURSO PARA FACELO!!
Ledicia absoluta coa volta ás ondas de Radio Xograr en directo para celebrar o Día do Libro 2022!!
Da man do mestre de cerimonias Miguel Cumbraos e o seu fantástico equipo: Carla; Aitana; Alba; Xabi; Mateo e Fausto co baustismo radiofónico de Marc no soporte técnico.
Entretidísimo programa especial adicado íntegramente ao Día do Libro con lecturas, difusión das nosas actividades e a valiosísima participación de Luis Lopéz Alonso, o noso autor local apoiándonos coa súa suxestiva locución. Luxazo!!
Vivimos tempos convulsos. Está presente o conflito de Ucraína, pero lembramos tamén as guerras activas en Siria, en Yemen, en Etiopía, en Afganistán, en Myanmar, en Angola e Somalia; en Palestina tamén… Guerras terribles, unhas máis coñecidas; outras desgraciadamente case ignotas.
A través dunha instalación situada na propia bilbioteca invitamos a pensar nos libros como unha trincheira contra a violencia, contra a intolerancia, contra todas as guerras. Moito do noso alumnado pasou a participar nesta iniciativa que aínda que ten un carácter simbólico supón un xesto activo para recoñecer nos libros unha garantía de civilización e cultura contra a barbarie.
Atrincheirándonos nos libros quizáis non se poderán parar pero poñeremos unha defensa infranqueable para poder evitar. Ler, como non, será sempre un acto de paz.
No Día Mundial da Saúde o alumnado de Bioloxía de 1º Bac preparou unha pequena mostra visual para coñecer e interpretar as análises de sangue.
Trátase dunha serie de paneis visuais onde se representan os elementos que conforman a análise do sangue dende unha perspectiva descritiva e accesible. Os paneis explican e aclaran as características bioquímicas e as particularidades do hemograma neste tipo de mostraxes. Unha aportación sinxela pero valiosa realizada polo Departamento de Bioloxía para afondar dende a nosa biblioteca no coñecemento integral da nosa saúde.
No recreo de onte decididimos secundar as actividades polo Día da Poesía coa declaración solemne do “Estado poético permanente” polo cal formamos un exército da palabra disposto a usar a palabra como bandeira universal e armándonos de libros limos un manifesto poético contra TODAS as guerras.
Tamén colocamos un mural para crear un manifesto máis aberto e participativo. Especial mención ao alumnado de 1 ESO e o 2 ESO C pola súa combativa participación!!
Máis de catrocentos rapazas e rapaces de todos os centros educativos da comarca concentráronse na Praza da Vila onte nun acto organizado pola nosa biblioteca irmá do IES “Gregorio Fernández”. O obxectivo era claro: reivindicar o Día das Letras Galegas para a figura e a obra de Fiz Vergara Vilariño, o noso poeta louzarín.
Do noso centro acudiron todos os grupos de Bacharelato, acompañados polas profesoras de Lingua e Literatura Galega: Lola Chaos, Teresa López e Carmen Vivero. Leron algunhas composicións poéticas de Fiz e o alumnado que forma a agrupación “Siniestro Parcial” culminou o acto coa súa actuación musical, na que se interpretaron temas que musicaban versos de Fiz Vergara Vilariño.
Un acto cheo de ledicia e entusiasmo que nos devolveu a enerxía e nos deu azos para seguir crecendo como comunidade lectora na defensa dos/as nosos/as autores/as locais.
No noso centro botamos man do material didáctico que nos achegou Eduardo Rey para extender a actividade tamén ao contexto das aulas e dese xeito arredondear unha xornada certamente memorable.
Sempre reivindicamos o papel das bibliotecas como polos creativos. Somos espazos fundamentais para a creación e a reflexión estética. Neste sentido, a relación entre o museo e as bibliotecas resulta imprescindible para desenvolver aprendizaxes artísticas significativas. Con este compromiso, buscamos a colaboración coa @fundacionluisseoane para organizar unha actividade en relación cunha exposición da súa actual programación ben interesante: “Tapas #1. Unha parte do todo”.
O vínculo entre arte e deseño editorial foi un dos alicerces da práctica artística de Luis Seoane, o artista que insipira o proxecto TAPAS #1. Unha parte do todo. Esta exposición está formada por case un centenar de proxectos artísticos de formato editorial realizados por 76 creadores nacionais e internacionais. É case un centenar de libros que poden ser entendidos como auténticas obras artísticas. A exposición ofrece unha mirada a evolución do propio formato do “libro de artista” en toda a súa dimensión. A mostra reflicte, sobre todo, a vocación creativa destes soportes bibliográficos a través do deseño.
Na nosa biblioteca tentatamos montar unha pequena réplica da exposición orixinal que se encontra na Fundación Luis Seoane. Parecéunos axeitado botar man do marabilloso catálogo impreso en rotativa (formato xornal) pola editorial @fabulatorio_ e montamos con el o display. A exposición orixinal pode verse na Fundación Luis Seoane na Coruña ata o 17 de abril. A nosa durará esta semana de febreiro ata o 21 de febreiro.
Agradecemos a Fundación Luis Seoane e a especialmente a súa directora Silvia Longueira pola súa cortesía e colaboración con esta iniciativa da nosa biblioteca arredor do libro de artista.
“Pola Candeloria casan os paxaros e vaise a galiñola” ou eso dí o noso refraneiro dos primeiros días de febreiro… vaites!!! Era hora xa de rematar con xaneiro,non? O día da Candeloria celébrase o 2 de febreiro e ten unha orixe pagana vinculada a ritos que teñen que ver cono ciclos naturais. Malia isto, a Candeloria é, por riba, de todo unha festa da Luz que aventa a primaveira. Co Departamento de Bioloxía decidimos desenvolver un ciclo de actividades para recuperar o noso vínculo coa natureza ao longo de distintos momentos do curso. Neste caso, saimos fora para observar aos paxaros casadeiros e de paso aprender algo de ornitoloxía…!
Esta actividade está dentro da PXC en coordinación coa Vicedirección
Ademais de lembrar e reivindicar o papel dos profesionais da ilustración, cada ano é homenaxeado un ilustrador histórico galego. Este ano foi o pintor e ilustrador Reimundo Patiño. (1936-1985) Neste vídeo podes coñecelo un pouco máis:
Dende o mércores 26 de xaneiro, fumos desenvolvendo no noso centro diversas actividades arredor da figura de Reimundo Patiño e tamén sobre o formato de álbum ilustrado como soporte de lecturas tranversais, creativas e conformadoras dunha cultura libresca ampla e heteroxénas. O programa de actividades foi o seguinte:
Actividade de creación & experimentación cromática (coa colaboración do departamento de EPeV)
Exposición “Mundo Álbum” cunha escolma de referencias bibliográficas arredor deste formato na propia sala da biblioteca.
Actividades de aula “Que mundo éste!” para achegarnos á figura de Reimundo Patiño a través dunha tarefa de creación.
Ademais, o Clube de Lectura “O xograr lector” de 1º ESO realizou unha xuntanza para falar do marabilloso libro de Manuel Rivas con ilustracións de Susana Suniaga coincidindo co gallo da Dia da Ilustración.
Actividade de creación & experimentación cromática: realizouse no recreo do día 26 de xaneiro coa participación dos cursos de ESO, maioritariamente. A activiadade consistiu en replicar os modos de experimentación pictórica que o propio Reimundo Patiño realizaba. Os resultados foron certamente abraiantes e sobre todo moi divertidos!! As obras resultantes quedaron expostas no corredor anexo á biblioteca.
Exposición “Mundo Álbum”: na sala da biblioteca estivo exposta unha escolma de referencias bibliográficas arredor do formato do álbum ilustrado. Pareceunos importante poñer en valor este formato editorial por unha cuestión de oportunidade (recoñecer a labor creativas dxs ilustradorxs) pero tamén para aprofundizar nun formato que se percibe dentro da audiencia lectora infantil pero que trascende esta franxa de idade. Realizamos tamén un listado de suxerencias lectoras baseándonos nos fondos da propia exposición.
Actividades de aula “Que mundo este!”: botando man dunha das viñetas de Reimundo Patiño e Xaquín Marín na banda deseñada “2 viaxes”, o Departamendo de Lingua Galega e o equipo da biblioteca propuxémoslles ao alumnado de 1º e 2º de ESO que a entintaran con distintas cores e tramas. Deste xeito, puidemos desenvolver a nosa competencia plástica e visual e lembramos a figura deste creador senlleiro da nosa cultura e do seu papel na defensa da lingua galega.
Rematamos o ano cunha marabillosa actividade chea de ilusión e creatividade. Para esconxurar este ano que comezamos cada alumno/a escribiu un desexo nunha pluma feita en papel que logo se foron superpoñendo nun panel ata formar unhas maxestuosas alas para emprender o voo cara un porvir favorable. Arte para atopar a esperanza e a confianza nun tempo mellor!
BiblioXograr 