Actividade que puxemos este curso en marcha. E que permitiunos ir descubrindo moitas obras pictóricas que descoñecíamos. Grazas á profesora Sol Rodríguez, que coordinou esta acción, e a todos e todas que colaboraron, persoas da comunidade educativa do noso centro escolar. Preme no documento xunto para ver o resumo de todos os cadros dende outubro ata maio
Mes: Maio 2021
21 de maio- Día da Diversidade Cultural
Non esqueceuse dende a biblioteca propoñerlle ao departamento de Orientación (Jose e Elena) traballar unha data sinalada como é o 21 de maio, Día da Diversidade Cultural. Puxéronse mans á obra e implicaron ao alumnado de procedencias diversas que estudan no noso centro para conseguir un traballo singular. Así, podedes ver como eles e elas explican diversas festas dos seus respectivos países de orixe.
Moita Xela…no Xograr
Non podía ser menos, pola relación que tiña a autora homenaxeada nas Letras Galega 2021 coa nosa vila de Sarria. Así, e dunha forma interdisciplinar, artelláronse no noso centro escolar numerosas actividades.
Meses atrás, Radio Xograr emitiu a lectura duns poemas significativos cando se soubo que sería a homenaxeada. Tamén, o noso IES dedicoulle unha das súas “rúas” no rueiro de mulleres que destacaron en eidos diversos, neste caso o corredor que vai cara á biblioteca, no marco do 8 de marzo. Tamén en marzo participouse no proxecto “ Aquela nena de Sarria” do colectivo “Egena”, no que tomou parte alumnado de ESO e BAC, e artellouse unha exposición de paneis con traballos realizados polo alumnado xograrino.
Xa máis enriba do 17 de maio, tanto antes coma despois, procedeuse a lecturas de poesía súa en diversas clases e niveis. Alumnado de 1º e 4º ESO participaron nunhas lecturas “on line”, xunto a o IES Castelao de Vigo, organizadas dende A Cidade da Cultura. Outras e outras protagonizaron parte do documental “Vencerse é cousa de se tratar” , sobre a vida de Xela que emitiu Televisión de Galicia (TVG).
Organizamos o proxecto colectivo intercentros sarriaos, coa colaboración do Concello de Sarria, “Camiños Literarios de Xela Arias”, finalmente realidade tras un adiamento por culpa de choiva. E xa no noso centro luciron diversos traballos creativos sobre os poemas da escritora sarriá, ampliando nun formato máis grande algúns deles.
E como o exterior do noso centro é un espazo tamén para amosar actividades, baile tradicional e moderno, por parte de alumnos e alumnas de 1º e 3º ESO, así como de 1º de Bacharelato. E non esquecemos a interpretación do poema “Des-concerto” musicado por “Écheoquehai”.
Podedes ver neste post diversas fotografías, así como premer no enlace que vos leva ao documental emitido pola nosa canle autonómica. Grazas a todos e todas pola colaboración nesta completa lista de actividades.
2ª reunión do Clube Lector “ O Xograr Lector”: fotolibros e Paco Gómez
De xeito telemático, alumnado, profesorado e o fotógrafo Paco Gómez déronse cita durante case dúas horas no marco da segunda reunión do presente curso do “Xograr Lector”, o club lector do noso centro escolar.
Aquí tes un vídeo de Paco Gómez invitándonos ao visionado do seu libro
Falouse, comentouse, intercambiáronse opinións sobre o fotolibro “ Wattebled o el rastro de las cosas”, do citado autor madrileño….con avoa por certo galega, de orixe coruñesa. Interesantes e aproveitados minutos de posta en común sobre unha historia singular onde recordos, fotografías e vivencias van xuntas da man. Puidemos tamén profundizar no noso coñecemento o formato do fotolibro, dentro da nosa iniciativa de incluir este formato no conxunto das nosas lecturas
Máis cine, por favor!!!
Unha doazón anónima de películas que permite aumentar os nosos fondos multimedia cunha serie de films adaptados a públicos diversos como indica o seu correspondente adhesivo de cor. Títulos moi coñecidos do chamado “sétimo arte” que xa están debidamente catalogados e á vosa disposición para gozar tranquilamente da maxia do cine.
9 de maio – Día de Europa
Propuxémoslle ao departamento de Ciencias Sociais facer algo co gallo do Día de Europa. Liáronse a manta á cabeza, liaron a alumnos de diversos cursos e fixeron un sinxelo video baseado na frase “ Eu Son Europa”. Grazas a Paula, Diego e Xosé Lois podedes ver a alumnos e alumnas do noso centro escolar traducindo dita frase a linguas tan diversas como o inglés, francés, alemán, italiano, portugués, etc.
2ª reunión do Xograr Lector
Paco Gómez anímavos a participar na segunda reunión do Club Lector “ O Xograr Lector”, que terá lugar o vindeiro mércores 19 de maio. Será pola tarde, ás 15h45 e no formato videoconferencia, como na primeira. Pero, vos preguntaredes: quen é Paco Gómez? pois o escritor do libro sobre o que imos falar, é dicir “Wattebled o el rastro de las cosas”. Preme no vídeo para escoitar as súas verbas e non te esquezas de pasar pola biblioteca e coller un exemplar dun libro que é doado de ler e te vai sorprender gratamente.
O cadro do mes
Desta volta o de maio, nesa sección que dende a biblioteca ofrecemos mes a mes bautizada como “Algo máis ca un cadro”. Quenda para o profesor de Relixión e membro do equipo da biblioteca Jorge Marcos quen aporta o seu. Jorge cóntanos moitas cousas sobre unhas das grandes obras do pintor catalán Salvador Dalí. Preme no documento en soporte pdf e atoparás pormenorizada a análise desta obra mestra da pintura española.
Números de abril
Satisfeitos coma sempre dende a biblioteca cos números mensuais, tanto a nivel préstamos como catalogacións de novos fondos ou de fondos anteriores sen catalogar correctamente. A seguir así, pois nas vindeiras estatísticas de maio e xuño. Grazas a todos e todas pola colaboración!!!
Mural de Lolita Díaz Baliño
Contando coa axuda da Area de Cultura da Deputación de Lugo e enmarcado dentro do proxecto “IlustrarNÓS”, o noso centro tivo acceso á realización dun gran mural, que xa decora unha das paredes exteriores do edificio 2. Foi realizado pola ilustradora-muralista Ana Santiso e representa a Lolita Díaz Baliño (1905-1963) , pintora coruñesa a quen se lle dedica o Día da Ilustración 2021. O mural, que busca darlle a Díaz Baliño o recoñecemento que non tivo no seu momento, é un retrato desta creadora, por certo tía do coñecido intelectual lucense Isaac Díaz Pardo, con elementos sacados das súas ilustracións. Recrea un pouco elementos nos que a artista coruñesa movíase e traballaba, como a costa da Coruña, a propia vila da Coruña ou o seu estudo. Nas fotos que acompañan este post podedes ver fases do proceso de realización que levou a cabo Ana Santiso no noso centro escolar.
BiblioXograr 